Costa Brava, einstakur staður með rafmagnað andrúmsloft!

Costa Brava er einn af okkar uppáhalds stöðum! Þarna mun engum leiðast en Costa Brava er stútfull af afþreyingu og ekki skemmir hvað umhverfið er fallegt. Bærinn sem gist er í heitir Lloret de Mar og er fullur af ungu og hressu fólki sem vill skemmta sér. Flestir Íslendingar þekkja Spán og vita hvað landið hefur upp á að bjóða; sól, strönd, gott verðlag og frábært næturlíf. Yfir 100 næturklúbbar og barir eru í bænum og ættu allir því að finna stað við sitt hæfi.

Eins og áður var nefnt er heill hellingur af afþreyingum á svæðinu. Þar má nefna Catamaran siglingu, Water world, Go-Cart, Portaventura og margt margt fleira. Allt er þetta á svæðinu og flest í göngufjarlægð við hótelið. Þeir sem vilja nýta sólina og liggja í sólbaði er um nóg af ströndum að velja og getur verið upplifun að ferðast í bæina í kring og fara á ströndina þar.

Flogið er til Barcelona eða Girona og er það um klukkustunda keyrsla yfir á Lloret de Mar. Hótelin sem við bjóðum upp á eru á besta stað í bænum, nálægt ströndinni og næturlífinu. Á hverjum degi er svo dagskrá með afþreyingum sem hægt er að skrá sig í fyrir ferðina og sjá fararstjórarnir á svæðinu til þess að allt gangi vel og að öllum líði sem best.