Drekar & drangar

Við lendum í höfuðborginni Beijing um klukkan 9:50 um morguninn. Við lendingu verður tekið á móti okkur og við höldum með rútu á hótelið sem er staðsett í hjarta Beijing.

Eftir langt ferðalag verður fólk eflaust misvel upplagt og því er engin formleg dagskrá þennan dag. Margir vilja sennilega leggja sig og hvíla sig eftir ferðalagið, á meðan aðrir vilja spóka sig um og fá fyrstu kynni af þessari stóru og miklu borg

Við mælum með að prófa Zhajiangmian-núðlur! Gómsætan núðlurétt sem er einn af vinsælustu réttum Beijing.

• Byrjum daginn á morgunmat á hótelinu.
• Skoðunarferð um Tiananmen-torg og Forboðnu borgina, eitt helsta kennileiti Beijing. Þar göngum við um gamla keisarahöllina, skoðum glæsilegar byggingar og húsagarða og kynnumst sögu kínversku keisaranna.
• Kvöldið er svo frjálst. Tilvalið að rölta um borgina, finna sér góðan veitingastað og bragða á jiaozi, kínverskum dumplings sem fást í ótal útgáfum.

• Frjáls dagur með valkvæðum ferðum
• Skoðunarferð um Himnahofið, eitt þekktasta kennileiti Beijing.
• Heimsækja fjölskyldu sem býr í hefðbundnu hutong-hverfi og fá þannig innsýn í daglegt líf heimamanna. Einnig verður hægt að taka þátt í hefðbundnu kínversku pappírsskurðarnámskeiði og prófa þessa gömlu listgrein.
• Seinnipartinn kveðjum við Beijing og förum með hraðlest til Xi'an. Lestarferðin er skemmtileg upplifun í sjálfu sér og gefur okkur tækifæri til að sjá aðeins meira af landslaginu á leiðinni. Við komu til Xi'an höldum við á Crowne Plaza Xi'an þar sem við komum okkur fyrir á hótelinu.

• Vöknum á Crowne Plaza Xi’an og byrjum daginn á góðum morgunmat á hótelinu.
• Því næst höldum við af stað til að skoða hina stórfenglegu leirhermenn sem voru gerðir til að gæta grafhýsis Qin Shi Huang, fyrsta keisara Kína. Þar sjáum við þúsundir hermanna, hesta og vagna úr leir, hvert verk með sín sérkenni, og fáum innsýn í ótrúlega sögu þessa merka staðar.
• Eftir viðburðaríkan dag höldum við aftur á Crowne Plaza Xi’an þar sem kvöldið er frjálst og hægt að slaka á eða halda út og kynnast borginni betur.

• Vöknum í Xi’an og byrjum daginn á morgunmat áður en við tökum hraðlestina til Chengdu. Chengdu er lífleg borg í suðvesturhluta Kína, þekkt fyrir risapöndur, kryddaðan Sichuan-mat, temenningu og afslappaðan borgarbrag.
• Við komuna til Chengdu höldum við á Chengdu Yuanheyuan Buddha Zen Hotel, þar sem við komum okkur fyrir. Hótelið er í hefðbundnum kínverskum stíl og staðsett við Wenshu-hofið, sem gefur því skemmtilega og rólega stemningu.
• Fyrsti dagurinn í Chengdu er svo án formlegrar dagskrár og gefst okkur tími til að kynnast borginni á eigin forsendum. Það er tilvalið að rölta um nágrennið, finna góðan veitingastað og prófa eitthvað af þeim frábæra Sichuan-mat sem borgin er þekkt fyrir.

• Frjáls dagur með valkvæðum ferðum
• Chengdu Panda Base, þar sem við fáum að sjá risapöndur í návígi og kynnast því umfangsmikla verndunar- og rannsóknarstarfi sem þar fer fram.
• Ferð til Leshan til að sjá hinn stórfenglega Leshan-risabúdda. Styttan er höggvin beint í klettinn, er 71 metri á hæð og er stærsta Búddastytta heims.

• Um morguninn verður haldið til Chongqing. Chongqing er ein stærsta og fjölmennasta borg Kína, með yfir 32 milljónir íbúa. Borgin er með risa persónuleika og er afar einstök, byggð upp í fjöllunum með háhýsum, brúm og götum á ótal hæðum.
• Við komuna höldum við á Four Points by Sheraton Chongqing þar sem við komum okkur fyrir og eigum svo frjálst kvöld til að kynnast borginni.

• Á degi 8 tökum við hraðlestina til Zhangjiajie, stórfenglegs fjallasvæðis í Hunan-héraði sem er ólíkt flestu öðru á þessari jörð.
• Í boði verður valfrjáls ferð upp í fjöllin með kláfi þar sem hægt er að njóta stórkostlegs útsýnis yfir svæðið. Að því loknu höldum við á Wyndham Garden Zhangjiajie Tianmen Mountain þar sem við gistum.

• Þennan dag er heilsdagsferð í hinn fræga Zhangjiajie-þjóðgarð, sem varð innblástur að svifeyjunum í Avatar. Farið er með kláfi upp á milli hinna stórfenglegu sandsteinssúlna og síðan með Bailong-lyftunni niður.

• Þennan dag förum við að Glerbrúnni sem spannar Grand Canyon-gljúfrið og að Baofeng-vatni, umluktu grænum tindum. Síðdegis höldum við á lestarstöðina og tökum hraðlest áfram til fornbæjarins Fenghuang.
• Við komuna höldum við á Wingate by Wyndham þar sem við komum okkur fyrir og gistum um nóttina.

• Dagsferð um Fenghuang, sem margir telja einn fallegasta fornbæ Kína. Stólpahús standa út yfir Tuo Jiang-ánni og siglt er eftir ánni á milli aldagamalla brúa, turna og borgarmúra.

• Ekið verður á lestarstöðina og þaðan tökum við hraðlest til Guilin.
• Við komuna höldum við á Sheraton Guilin Hotel þar sem við komum okkur fyrir.
• Dagurinn er að öðru leyti frjáls og tilvalið að ganga meðfram vötnunum í miðborginni og virða fyrir sér Sól- og Tunglturnana þegar kvöldar.

• Dagurinn er frjáls.
• Í boði verður valfrjáls dagsferð til Longsheng, þar sem stórfenglegar hrísgrjónaterrössur liðast upp fjallshlíðarnar. Á leiðinni er komið við í þorpi þjóðarbrots og kynnst meðal annars sérstakri hefð kvennanna þar fyrir síðu hári.

• Í boði verður valfrjáls dagsferð til Yangshuo með 90 mínútna siglingu um einn fallegasta hluta Li-árinnar, á milli grænna og mikilfenglegra karstfjalla.
• Að siglingunni lokinni verður rölt um hið líflega Vesturstræti í Yangshuo.
• Um kvöldið er svo hægt að sjá stórsýninguna Impression Liu Sanjie undir berum himni, með fjöllin og Li-ána sem stórfenglegt baksvið. Sjón er sögu ríkari, prófið að gúggla þetta.

• Ekið verður á flugvöllinn og flogið til Shanghai. Við komuna er tekið á móti hópnum og haldið á Grand Central Hotel Shanghai þar sem við komum okkur fyrir og fáum smá tíma til að hvílast eftir ferðalagið.
• Kvöldið er svo frjálst og tilvalið að rölta um borgina og skoða ljósadýrðina við The Bund og Pudong þegar kvöldar.

• Í boði verður valfrjáls heilsdagsferð um Shanghai þar sem við skoðum Yuyuan-garðinn og líflega markaðina í kring, röltum um hina frægu Nanjing-verslunargötu og heimsækjum Bundinn með sínum glæsilegu sögufrægu byggingum.
• Síðar um daginn förum við upp í Shanghai-turninn og njótum útsýnisins yfir borgina áður en deginum lýkur með kvöldsiglingu um Huangpu-ána og ljósadýrð Shanghai.
• Að ferðinni lokinni höldum við aftur á Grand Central Hotel Shanghai þar sem við gistum aðra nótt.

• Dagurinn er frjáls og án fararstjóra og bílstjóra.
• Í boði verður valfrjáls ferð til vatnaþorpsins Zhujiajiao, þar sem siglt er um síkin og rölt um gamla bæinn. Oft kallað "Feneyjar Kína".
• Á heimleiðinni er komið við í Jade-Búddahofinu, sem er þekkt fyrir tvær Búddastyttur úr hvítum jaðesteini.

• Ekið verður á lestarstöðina og þaðan tökum við hraðlestina aftur til Beijing. Ferðin tekur um fimm klukkustundir og á leiðinni gefst tækifæri til að sjá meira af landslaginu og sveitum Austur-Kína.
• Við komuna til Beijing höldum við á Sunworld Dynasty Hotel Beijing þar sem við komum okkur fyrir.
• Kvöldið er svo frjálst og tilvalið að rölta um borgina, versla eða smakka eitthvað af götumatnum sem borgin hefur upp á að bjóða.

• Skoðum Kínamúrinn við Juyongguan-skarðið, tilkomumikinn hluta múrsins sem liggur um fjalllendið rétt utan Beijing. Þar gefst góður tími til að ganga eftir múrnum og njóta stórfenglegs útsýnis yfir nærliggjandi fjöll.
• Síðdegis verður í boði valfrjáls ferð í Sumarhöllina við Kunming-vatn. Um kvöldið verður svo hægt að gæða sér á hinni frægu Pekingönd áður en haldið er aftur á Sunworld Dynasty Hotel Beijing.

• Ekið verður á flugvöllinn og flogið heim eftir þriggja vikna ferð þvert yfir Kína. Að baki eru keisarahallir, leirhermenn, pandabirnir, stórfengleg fjallasvæði, fornbæir og iðandi stórborgir og fullt af ógleymanlegum upplifunum úr einu fjölbreyttasta landi heims.